Este documento ten por obxectivo trasladar ao conxunto de empresas da nosa contorna as capacidades de I+D+i e servizos dispoñibles na Universidade de Vigo neste ámbito incluíndo as temáticas nas que se centran os grupos de investigación: investigacións agrarias e agroalimentarias, tecnoloxía de alimentos, ómicas de alimentación e saúde, bioenxeñería e procesos, bioloxía ambiental e enxeñería agroforestal, entre outros.
Máis ca unha simple recompilación de capacidades é un reflexo da dedicación do persoal investigador da universidade, que amosa unha profunda comprensión dos desafíos actuais e futuros aos que se enfronta o sector agroalimentario, desde a mellora dos métodos de cultivo ata a optimización dos procesos de produción, ou desde a investigación de novos ingredientes ata o desenvolvemento de tecnoloxías sostibles. Cada páxina de este catálogo reflicte a contribución da universidade onde a innovación e o coñecemento se xuntan para impulsar o crecemento sostible do sector e unha transformación positiva da industria.
