O ShanghaiRanking’s Global Ranking of Academic Subjects (GRAS) 2026 xa está publicado e sitúa a Universidade de Vigo en 12 disciplinas científicas. Entre os resultados máis destacados atópanse as áreas de Food Science & Technology e Agricultural Sciences, estreitamente relacionadas coa actividade investigadora do Instituto de Agroecoloxía e Alimentación (IAA).
En Food Science & Technology, a Universidade de Vigo alcanza o posto 25 a nivel mundial, consolidando a súa posición internacional nesta área. A UVigo sitúase, ademais, como a terceira universidade europea nesta disciplina, só por detrás de Wageningen University & Research e University College Dublin.
En Agricultural Sciences, a UVigo sitúase no rango 151-200 a nivel mundial, mellorando respecto da edición de 2025, na que se atopaba no rango 201-300.
O posicionamento da Universidade de Vigo nestes ámbitos está estreitamente relacionado co traballo desenvolvido polos seus institutos e centros de investigación. Entre eles destaca o Instituto de Agroecoloxía e Alimentación (IAA), con sede no Campus Auga, que xoga un papel determinante na investigación en áreas como a Ciencia e Tecnoloxía dos Alimentos e as Ciencias Agrícolas.
Estes resultados poñen de manifesto a proxección internacional da investigación desenvolvida na Universidade de Vigo en ámbitos estreitamente vinculados ás liñas de traballo do IAA.