Paula Pérez Rodríguez e Daniel Arenas Lago, (IP do proxecto na UVigo), asistiron a unha reunión do proxecto GreenSoilvin a semana pasada nas instalacións da Adega Martín Códax. GreenSoilVin “Obtención de viños sostibles e de calidade mediante estratexias alternativas na xestión da fertilidade” é un proxecto de Grupos Operativos financiado pola Xunta de Galicia con fondos FEADER 2022/023B en colaboración coas adegas Martín Códax, Altos de Torona e Paco&Lola (coordinadores do proxecto).
O obxectivo deste proxecto consiste en instaurar cubertas vexetais nas calles dos viñedos co fin primeiro de reducir a aplicación de fertilizantes químicos e tamén de mellorar a calidade do solo, é dicir, reducir a erosión, aumentar a auga do solo e aumentar o secuestro de carbono no mesmo, mellorar a abundancia e diversidade microbiana e, polo tanto, aumentar a fertilidade natural dos solos e mellorar a súa saúde.
Na reunión técnica (puntos do día nunha das fotos) presentáronse datos das últimas dúas campañas en relación á calidade da uva e a parámetros edafolóxicos (estado do solo) e tamén se levou a cabo unha cata de viños elaborados a partir de microvinificacións obtidas dos distintos tratamentos testados no proxecto:
1) uso de fertilizante químico
2) a metade de fertilizante químico combinado con cubertas vexetais e
3) só cubertas vexetais. Catáronse un total de 15 viños procedentes dos 3 tratamentos aplicados en: un viñedo de Altos de Torona con dous manexos das cubertas distintos (enterrándoas e deixándoas en superficie); un viñedo de Paco & Lola e dous viñedos de Martín Códax en dúas Denominacións de Orixe (Rías Baixas e Monterrei) onde as cubertas se enterraron. Os resultados sensoriais dos viños obtidos resultaron significativamente diferentes.
En xeral, os viños procedentes do solo só con cubertas vexetais tiñan máis complexidade e notas máis vexetais resultando mellores en nariz, mentres que os viños procedentes de solos con fertilizantes químicos eran máis frescos e con mellores resultados en boca, segundo os expertos. Con todo, os gustos foron moi diferentes entre os asistentes.