Dende o Instituto de Agroecoloxía e Alimentación participamos no proxecto europeo Net4Food, cuxo fin último é reforzar as capacidades investigadoras e innovadoras do ecosistema alimentario da Eurorrexión Norte de Portugal – Galicia, a través da posta en marcha do Iberian foodtech lab. Este laboratorio nace coa misión de poñer as últimas tendencias en tecnoloxía, investigación e innovación ao servizo das empresas, contribuíndo así a facer máis competitivo o sector alimentario da Eurorrexión.
Neste contexto, o pasado 29 de maio celebrouse en Santiago de Compostela un obradoiro para coñecer de primeira man as necesidades das empresas alimentarias en materia de I+D+i. Deste xeito, as empresas do sector, xunto cos centros tecnolóxicos e centros de investigación, identificaron os principais retos que debe afrontar o ecosistema alimentario da eurorrexión Galicia – Norte de Portugal para sentar as bases do foodtech lab ibérico.
A continuación expóñense os 10 retos identificados no obradoiro:
1. Orientar as liñas de investigación (universidades, cluster, etc.) para que estean aliñadas coas necesidades reais do sector alimentario e viceversa.
2. Romper o estigma actual asociado ao sector agroalimentario
3. Compartir recursos para facilitar o acceso ao financiamento de capital
4. Conseguir hábitos máis saudables a través da I+D e a sociedade
5. Permitir a valoración a escala industrial buscando rendibilidade para a empresa
6. Mellorar os procesos produtivos para que sexan máis eficientes e cheguen a 0 residuos
7. Contribuír a que o sector alimentario desenvolva novos alimentos sans e sostibles con éxito no mercado, mellorando así a súa competitividade.
8. Crear unha organización interprofesional, onde participen todos os axentes da cadea Avlor, dende a universidade ata o sector primario
9. Mellorar a accesibilidade e a calidade da información alimentaria, así como a xeración de pensamento crítico desde a infancia
10. Asegurar que os alimentos cheguen ao territorio dunha forma loxística áxil, coa máxima calidade, concretamente en longas distancias para produtos perecedoiros.
O 1 de xullo terá lugar un obradoiro similar na cidade portuguesa de Braga, co fin de coñecer as necesidades das empresas alimentarias portuguesas.